Agustín Fernández Paz

Agustín Fernández Paz  acaba de ser galardoado co VII Premio Iberoamericano SM de Literatura Infantil e Xuvenil polo seu compromiso cos  valores humanos  universais  e o  seu papel determinante na construción dunha  literatura infantil  e xuvenil en lingua galega. É a primeira vez que un premio a nivel internacional recoñece  a traxectoria dun escritor en lingua galega . Congratulámonos de tan boa nova.

Agustín Fernández Paz  forma parte dos nosos escritores máis queridos e apreciados. Hai uns anos puidemos contar coa súa presenza na entrega dos premios do III Certame literario de Sanxenxo,  e cando botamos a andar o club de lectura foi  o seu libro Noite de voraces sombras o que abriu as propostas de lecturas dese ano. 

No presente curso escolar outro dos seus libros máis premiados, O único que queda é o amor está proposto como lectura en todos os institutos que participamos no proxecto ARCE. Sen dúbida, unha boa elección que non defraudará.

Homenaxe a María Dolores

Comezamos o curso con tristeza.

Temos que despedir á compañeira Mª Dolores Martínez Tobío, docente no IES Luis Seoane de Pontevedra e responsable da biblioteca escolar do centro. Hai só uns meses que Mª Dolores nos puxo a Salvar Libros por centros de toda Galicia. Salvar os libros que valen a pena, as linguas nas que se escriben eses libros, as bibliotecas nas que se gardan... a memoria dunha mestra que día a día traballou a favor da cultura e a educación.

Este é un documento colaborativo como tantos outros nos que Mª Dolores adoitaba participar co seu habitual entusiasmo. Desgraciadamente convocounos hoxe a súa despedida e pensamos nesta pequena homenaxe que xorde da mesma rede que ela axudou a tecer. Canto tempo e ilusión dedicados a Biblioiris, a súa bitácora vinculada á biblioteca escolar do instituto!  Por iso os nosos blogs lamentan hoxe a súa ausencia. Por iso esta entrada será publicada por moitos outros centros, ademais dos que aquí figuran. Esperamos que este documento saiba representar tamén a tantas persoas que, desde a rede PLAMBE das bibliotecas escolares galegas, desexan expresar o seu pesar e as súas condolencias á familia e amigos da nosa compañeira. Son tantos os centros que a súa relación excede as dimensións deste documento.

Grazas Mª Dolores polas palabras, polas reflexións, polas propostas, polo tempo, polo que fixemos xuntos e que permitirá seguir camiñando pola ruta das bibliotecas escolares.

Cristina Novoa

Pilar Sampedro

Asesoría Bibliotecas Escolares

Imaxe das ligazóns: Rapaza lendo. Gustav Adolf Hennig

Vía Mesturas. Grazas!!